Con un estrangero quine tiene dos pasaporte ya salva el tropa military del Sabado tarde na vicinidad del island de Sibago, municipio de Mohamad Ajul, alla na provincal de Basilan.
Si Rear Admiral Toribio Adaci, comandante del Fuersa Naval na Western Mindanao, ya nombra con el salvao estrangero como si Amir Sarkarifari, de quien nombre ya puede establisa por medio del su pasaporte de Sweden y Iran.
Base na inicial investigacion cay si Sarkarifari ta navega desde Guam para na Brunei cuando ya keda malo el makina del su yate.
Por causa de ese, el yate de Sarkarifari ya man anud-anud na mar hasta ya llega ele na vicinidad del isla de Sibago, na municipio del Mohammad Ajul.
Con el yate de Sarkarifari ya hila para na quartel del Fuersa Naval del Weste Mindanao aki na ciudad myentras con el estrangero ya pone bajo el atencion medical na un ospital del military. (Bong Garcia Jr.)