Ya muri el dos empleyado del Basilan Electric Cooperative (Baselco) despues que ya tira canila ayer na Salain Drive, Barangay Sumagdang, na ciudad de Isabela, Basilan.
Si Tieniente Coronel Junpikar Sitin, hefe del pulis na ciudad de Isabela, ya nombra con el maga victima como canda Alvin Pangilinan, sincuenta’y tres, y si Reymond Singson, treynta’y sinco anios, ambos maga trabajante del Baselco.
Asegun con Sitin cay si Pangilinan, con quien ya tupa na cabesa, enseguidas ya muri, y si Singson, ya rebenta el resuello myentras bajo el curada medical na hospital.
Asegun con Sitin cay el maga victima ta compone con el linya de koreiente na Salain Drive, Sumagdang cuando derepente ya tira canila dos el un desconosido armao persona, quin enseguidas ya escapa despues del incidente.
Si Sitin ta cre cay el motivo del incidente tiene coneccion na trabajo del dos victima. (Bong Garcia, Jr.)