Maga autoridad ya aresta tres tripulantes de un jungkong y confisca uno punto dos milyones de pesos cantidad de contrabando na campanya contra smuggling aqui na ciudad de Zamboanga.
Si Coronel Alexander Lorenzo, Zamboanga City Police Office director, ya nombra con el maga arestao tripulantes como canda Arjay Salim, treynta’y sinco años, Jabar Tingkahan, veinte ocho años, y si Asmad Tingkahan, cuarenta’y tres años el edad y todo maga residentes de Maluso, Basilan.
Asegun con Lorenzo con el tres tripulantes ya aresta cuando maga personajes del 2nd Zamboanga City Mobile Force Company y del Buro de Aduana ya columbra un jungkong lleno de cigarillo myentras ta man patrulya maga alas sinco cuarenta del martes tarde serca na isla de Manalipa, este ciudad.
El jungkong ta contene treynta’y seis cahon de cigarillo que tiene el valor de uno punto dos milyones de pesos. Ta viaja el jungkong para na municipio del Alicia na provincia de Zamboanga Sibugay estaba na Jolo, Sulu.
Asegun con Lorenzo ya confisca con el maga cigarillo y aresta con el tres tripulantes cay nohay sila puede presenta documentos sobre el de ila cargamento.
El tres tripulantes, jungkong, y maga cigarillo ta esta ahora bajo na custodiya del Buro de Aduana. (Bong Garcia, Jr.) (Photo Courtesy of Zamboanga City Police Office)