Maga autoridad ya aresta na un law enforcement operation trese personas por el crimen de robbery in band na provincia de Basilan.
Asegun con Coronel Richard Verceles, operations chief del Area Police Command-Western Mindanao, cay con el maga suspechao ya aresta durante un warrant of arrest operation maga alas ocho y media del Lunes denoche na Barangay Matikang, Lantawan, Basilan.
Si Verceles ya nombra con el maga arestao suspechao como el maga siguentes: Alvin Sahirin Jaafar; Mahadali Lunsulan Ajam; Gulam Jaafar Ajam; Usman Ladja Allani; Najer Malintuha Jaafar; Abbing Allama Ajubakkal; Majidul Ahilan Pulalon; Aldam Omar Ibay; Ablayan Jahang Abirin; Nurulla Tanjili Jamirul; Luna Jahang Abirin; Alih Jahang Abirin; y si Asmad Jahang Abirin; todo maga residentes del Barangay Lawi-Lawi, Lantawan.
Si Verceles ya habla cay el trese suspechao tiene pendiente orden de arresto y piansa de cuarenta mil pesos cada uno de ila desde’l tribunal del Ciudad de Isabela, Basilan.
Asegun cay el trese suspechao alegaomente amo el maga companieros del onse personas ya aresta por el semehante crimen del Domingo na Sitio Pangasaan, Barangay Tairan, Lantawan.
El maga suspechao envuelto na robo de uno punto tres milyones de pesos propiedad na maga casa del maga residentes del Hunyo kinse año dos mil deci-seis na Tairan, Lantawan.
Si Verceles ya habla cay con el maga arestao suspechao ya pone bajo el poder del Lantawan Municipal Police Station. (Bong Garcia, Jr.) (Photo lifted from Police Regional Office- Bangsamoro Autonomous Region Facebook Page)