SARANGANI PROVINCE- Apil nga nibisita sa probinsya sa Sarangani intrada pa lang sa tuig, partikularminte sa bukirang bahin sa Barangay Maligang sakop sa lungsod sa Kiamba, ang mga taga-World Bank atong ikatulong semana sa bulan sa Enero, og kini ang dakong gipasalamatan ni Governor Steve Chiongbian Solon.
Gipangunahan ni Konstantin Atanesyan, usa ka Armenian national, ang delegasyon sa World Bank Independent Evaluation Group, kauban ang mga kadagkuan sa Department of Agriculture gikan pa sa kauluhang Maynila, Davao og Rehiyon Dose, aron bisitahon ang nagpadayon nga pagpatindog sa planta sa abaca sa may Maligang nga gidumalahan sa United Maligang Farmers Multi-purpose Cooperative.
Ang pagpabarog sa maong planta sa abaca kalakip ang mga modernong makina, delivery trucks og uban pang kagamitan, ang nagkantidad kinig P35.7 Milyones ka pesos nga gipondohan sa PRDP kon Philippine Rural Development Program ubos sa superbisyon nila Agriculture Secretary Manny Piñol og Pangulong Rodrigo Duterte, sa pag-ayuda sa worldwide financial institution nga World Bank.
Segun ni Mr. Jonathan “Toto” Duhaylungsod, ang provincial agriculturist, duha (2) lang ka lugar sa Mindanao ang gibisitahan, kini mao ang Tupi, South Cotabato og ang Maligang sa Kiamba, Sarangani. Buot matud pang tun-an sa World Bank ang kalampusan sa pagpatuman sa PRDP projects sa Sarangani Province aron i-rekomenda kining ipa-implementa usab sa ubang mga dapit.
Sa bahin ni Ricardo Añora, ang general manager sa United Maligang Farmers Multi-purpose Cooperative, dili lang taga-Maligang ang maka-benipisyo sa maong proyekto kundili ang tanang mag-uuma sa abaca sa entiro Sarangani. Sa pagkakaron, natapos na pag-konstrak ang bodega kon warehouse sa abaca sa Maligang, samtang anaa na sa 40% ang paghuman sa processing plant.
Dili malimtan ni Añora nga ang unang naghatag kanilag stripping machine napulo (10) ka tuig na ang nakalabay atong tuig 2009 mao mismo si Governor Solon bise gobernador pa kaniadto. Hangtud naayudahan sila sa MRDP, DOST, Philippine Fiber Industry Development Authority, og kini na karong PRDP. Ni-income matud pa sila sa ilang makanunayon nga pag-apil sa mga trade fair, sama sa MunaTo Festival sulod sa Kapitolyo sa Sarangani og ang pagbaligya sa mga mall sa Gensan, Davao og Manila. Makanunayon usab matud pa ang pag-order kanila ni Ms. Gina Lopez, kanhing DENR secretary og maoy nangulo sa ABS CBN Lingkod Kapamilya Foundation, gina-display didto sa Maynila.
Sementado na ang dalan sa Maligang bisan anaa sila sa kabukiran, sa tabang gihapon sa PRDP nga gipondohan kinig dul-an P50 Milyones ka pesos. Daghan pang proyekto matud pa ni Governor Solon ang nakasulod sa ilang lugar, sama sa SAAD upland rice and livestock program, sa pagsuporta nila Senador Manny og Congressman Ruel Pacquiao, Vice Governor Elmer De Peralta, og tanang board member, municipal og barangay officials.