Giawhag ni Toledo City Mayor John Henry “Sonny” Osmeña ang Office of the Ombudsman-Visayas nga boluntaryo kining mo-“inhibit” sa imbestigasyon batok kaniya ug sa ubang mga opisyal nga gireklamo sa kasong “plunder”.
Sayo niini, si Atty. Pablo John Garcia pormal nga mireklamo ngadto kang Visayas Deputy Ombudsman Paul Elmer Clemente pagsusi sa giingong kuwestiyonble nga Clean and Green Program sa Toledo City nga naglambigit sa kapin sa 210 milyones ka pesos nga “public funds”.
Si Garcia kaalyado sa Partido Demokratiko Pilipino- Lakas ng Bayan (PDP Laban) party samtang si Osmeña independente, ug pareho sila ni Garcia nga kandidato pagka-kongresista sa ikatulong distrito sa Sugbo.
Kombinsido si Osmeña nga adunay kapasikaran ang iyang hangyo labot sa pagpa-“inhibit” sa Visayas Deputy Ombudsman sa pag-imbestigar sa nahisgutang kaso.
Ang “legal panel” ni Osmeña mipresentar sa “printed list” sa 1993 “batch” sa UP College of Law nga nagpakita nga si Garcia ug ang Deputy Ombudsman “classmates” sa UP College of Law.
Si Atty. Inocencio dela Cerna, Jr., usa sa mga abogado ni Osmeña mitataw nga aduna’y mga “jurisprudence” nga makapalig-on sa ilang petisyon pagpa-“inhibit” sa Visayas Deputy Ombudsman.
Midugang si dela Cerna nga “premature” ang gibuhat ni Garcia sanglit dili pa man “final” ang Commission on Audit (COA) “report” nga maoy gigamit niining kapasikaran sa giduso niya nga reklamo batok sa kadagkoan sa Toledo City.
Ang angayan gyod unta nga mo-imbestigar sa nagisgutang kaso mao ang COA ug dili ang buhatan sa Ombudsman matod pa ni dela Cerna.
Sa iyang bahin, giangkon ni Garcia nga iyang “classmate” sa UP College of Law si Deputy Ombudsman Atty. Paul Elmer Clemente.