Human mulabay ang 6 ka tuig ug 5 ka tuig sa nahitabong robbery sa managlahing higayon niadtong tuig 2012 ug 2013 dinhi sa dakbayan sa Surigao, naila ra gayod sa mga kapulisan ang nag-inusarang suspetsado human milutaw ang resulta sa pag-proseso ug pag-kumparar sa latent prints ug fingerprints sa suspek nga nag-match pinaagi sa Automated Fingerprints Information System kun AFIS, ug naila ang suspek nga si Ronald Ugat Garde, 27 anyos, nagpuyo sa Brgy. Orok dakbayan sa Surigao.Kini sumala pa sa report ni investigator on case SPO1 Johans Castillo, mahitungod sa updates sa stautus sa “AFIS hits” nga mga kaso nga ilang nadawat gikan na sa kauluhan ning tuig 2018.
Subay na sa nahisgutang krimen nga nahimo sa nahisgutang suspetsado, alas 7:13 an takna sa buntag niadtong Disyembre 5 tuig 2012, sa Surigao City Pilot School nadiskubre nga ang classroom nia Amie Sanglitan, 39 anyos, Grade III public school teacher ug ang classroom ni Mrs. Candy Suzzane Jamora usa ka magtutudlo sa kindergarten sa nahisgutang eskwelahan, ang gilungkab sa wala mailhi nga suspek, ug nakuha ang mga butang nga colored TV, ace DVD players, microphone, speakers, yot box ug uban pa.
Ug sa laing insedente sa may alas 7:45 sa buntag niadtong Hunyo 17, 2013 nadiskubre ang pag-panlungkad sa Meat and Herbs General Marketing, nga nahimutang sa dalang Borromeo, Brgy. Taft dakbayan sa Surigao nga diin nakuha sa wala mailhing suspek ang balor Php 30,000 nga kantidad sa nagkadaiyang klase sa karne gikan sa mga freezers.
Niadtong mga higayona ang nahisgutang mga lugar nga diin nahitabo ang pag-panlungkab, gi-proseso sa mga personahe sa PNP Provincial Crime Laboratory pinaagi sa pag-kutlo sa latent prints ngadto sa mga butang nga posibleng nagutinan sa suspek ug ilang gipasa sa ilang higher headquarters didto sa kauluhan.
Niadtong Marso 14 ning kasamtangang tuig ang suspek nga si Ronald Ugat Garde nasikop sa kapulisan sa paglapas sa Batas Pambansa bilang 6 kun pag-hupot ug pag-tago og mahait nga hinagiban, ug didto na higayona gikuhaan sa akto ang suspek sa iyang fingerprints nga gi-proseso sa PNP crime laboratory ug gi-pasa usab sa kauluhan.
Sa gihimong berepikasyon sa Automated Fingerprints Information System (AFIS) database niadtong Abril 25 tuig 2018 migawas sa resulta nga pareho ang lakra o mga guhit sa latent prints nga nakuha sa crime scene ug ang fingerprints sa naasoy’ng suspetsado nga si Ronald Ugat Garde.
Tungod niini ang 2 kasong “robbery with force upon things” batok sa nahisgutang suspek, gisang-at ni investigator on case SPO1 Johans Castillo, Disyembre 28 ning kasamtangang tuig sa may alas 11 sa buntag sa city prosecutor’s office nga gidawat ug gi-administrar ni Atty. Joan Francis Alas-Esmero, Prosecutor 1 ning dakbayan sa Surigao.