Isip pincipal author nan RA 11010 na amoy nag-amyenda nan mother law na RA 10600 ni Gov. Lalo Matugas na nagmugna nan SNSU, tagtugutan kita nan CHED na ipahibayo sa ato mga constituents sanan stakeholders na aprubado na nan CHED Commission En banc an university status nan SNSU niadtong June 7, 2022. Sa pagkakuman, “on process” pa an Certificate of Universityhood na amoy rakan gihuyat na maguptan ni President Gamboa para opisyal na magsugod an SNSU.
Ugsa, salamat karajaw sa tanan nagtabang para ini matuman. Una sa tanan, salamat karajaw sa dedikasyon sanan kakugi ni Presidente Gamboa sanan ija team sa pag-comply nan mga requirements na bisan pa kun sige nag-update sanan nagdugang an CHED nan requirements, padajon gihapon sa pagsulong na matuman gajud an tumong nan balaod. Salamat sab sa CHEDRO Caraga labi na an mga Regional Directors na niing-ingkod sugod pa nan tuig 2013 sa pagkabalud nan RA 10600, an 2015 sa pag-file nan unang amendments, hantud sa pag-ingkod ko an July 1, 2016 diin tagkinanglan mag refile nan amendments, sanan hantud kuman sa ila pagtabang sanan pagiya sa SSCT para maka-comply nan requirements. Salamat sab kan CHED Chairman Popoy De Vera sa ija suporta na bisan adtun waya pa mahimong hingpit an pag-implementar nan SNSU, tagsuportahan nija an mg budgetary requirements nan mahimong unibersidad.
Sa parte nan balaud, pasalamatan ta an orihinal na nag-author niini na si Gov Lalo Matugas na nag-isip sanan nituo na kaya nato magpaapruba nan state university dinhi sa ato probinsya, na di na ta kinahanglan mag-apply na extension campus nan Caraga State University. Pasalamatan ta sab an ija co-author na si Former Cong. Guillermo Romarate. Dako sab ako pasalamat sa House of Representatives labi na kan Speaker @ Alan Velasco sanan Appro Chairman Ric Yap na tagsaligan ako isip Vice Chairman nan Committee on Appropriations na magsponsor nan yearly budget nan CHED sugod adtun 2019 hantud an niaging budget hearings. Nakatabang ini para masuportahan an budget nan SSCT bago pa man inin nahimong hingpit na unibersidad. Salamat sab sa mga nahimo na Chairman nan House Committee on Higher & Technical Education na si Cong. Ann Hofer sanan Cong. Mark Go sa ila suporta para an tanan university conversion laws na nahipasa kaiban nan RA 10600 adtun 2013, ma-extend an deadline pinaagi sa amendatory law sanan makapasa sa mga requirements na taghatag nan CHED.
Sa tanan nagtabang para matuman an SNSU, salamat karajaw! Sa SNSU, congratulations sanan mabuhay kamo!
(Source: Cong Bingo Matugas Facebook page)