Tag-inaugurahan sanan tagbendisyonan kahapon Hunyo 21, 2022 an Dialysis Center sanan Triage Room sa Surigao del Norte Provincial Hospital didto sa Sta. Cruz, Placer, Surigao del Norte.
An inaugurasyon tagtambungan nila outgoing Governor Francisco Lalo Matugas sanan ni kanhi Governor Sol Matugas ug mga opisyales sa Surigao del Norte uban sa Nephro Group of Dialysis Center.
Ini na 15 ka mga puro bag-o na dialysis machines na partnership sa Provincial Government ug sa Nephro Synergies, Inc. tagkalipay ni Governor Matugas na ibalita na ini na project tagsugdan ni former Governor Sol Matugas na kuman Municipal Mayor nan General Luna ug tagpadajon sa ija administrasyon hangtud nahingpit an pagplastar sa mga ekipo.
Tagbutyag ni Dr. Chloe Digal, Chief sa SDNPH na daku na ini na ikatabang sa mga indigents na makapahimuyos sa programa pinaagi sa PhilHealth sanan Medical Assistance Program.
Taghuyatan ra kan an final inspection sa DOH Central Office para sa approval sanan accreditation para sa pagsugod sa operasyon.
Mikabat sa kapin kon kulang 40milyones pesos an kantidad sa pagpahimutang sa maong mga ekipo lakip na an pag-andam sa building sanan mga lawak nga giplastaran niini. An area na gipwestohan anaa sa 300 square meters ug an Nephro Synergies, Inc. nag-abang nan 60,000 pesos kada buyan na may 3% escalation sa ikatuyo na tuig sanan sa mosunod na duha ka tuig. May share na 2.5% an provincial government sa bayad nan Philhealth ngadto sa Nephro Synergies, Inc.
Dinhi sa Surigao del Norte nahibaw-an na hamok an mga pasyente na nagpa dialysis sa public and private hospitals sa Surigao City. An kasagaran gasto sa magpa dialysis sa pribadong tambalanan anaa sa 3,800pesos per session ug jaoy mga pasyente na kaduha ngadto sa katulo ka beses ipailawom sa dialysis. Sa Caraga Regional Hospital kinahanglan usab an booking sa mga pasyenteng may renal failure ug kinahanglan na ang schedule sa mga adlaw na kini magpadialysis. (RPN DXKS Surigao with pictures contributed by WG)