Surigao: 74 ka mga baboy nga naggikan sa usa ka ASF Infected Area sa Lanao del Norte, wala makasulod sa probinsya

0
1

Atol sa gihimong paspas nga pagresponde sa City ug Provincial Veterinary Office, human nga adunay usa ka concerned citizen and mipadangat kanila ug impormasyon, kabahin sa usa ka kadudahang meat van nga miabot sa Brgy. San Juan, ning atong syudad sa may 9:30 sa buntag kapin kung kulang, napugngan ang planong paghatod sa 74 (80 gyud kini tanan, apan ang 6 na deliver na ngadto sa Nasipit) ka mga baboy nga gisuspetsahang nagdala sa delikado nga sakit nga gitawag nga African Swine Fever (ASF).

Visit RPN DXKS Surigao

Ang maong mga gagmay’ng baboy nga nagkantidad sa Php 7,500 ang matag usa, base sa Barangay Certification nga gi presentar ngadto sa City Police Station, nag gikan pa sa Brgy. Kirapan, Sultan Naga Dimaporo, Lanao del Norte. Apan base usab sa salaysay sa drayber, ang maong mga baboy gikuha pa nila gikan sa Brgy. Kapatagan, sakop gihapon sa maong lalawigan. Ang maong barangay usa sa mga gi deklara nga ASF Infected Zone base sa Updated National ASF Map gikan pa niadtong Hulyo 15, 2022.

Gidudahan sa mga katawhan sa Brgy San Juan ang maong meat van tungod kay ang maong sakyanan walay atop ug sa pag abli sa likod nga bahin niini mga buhing baboy ang nakita sa mga awtoridad sa City ug Provincial Veterinary Office nga gipangunahan nila Dr. Maridel Zerda, DVM ug Dr. Jessica Rosete, DVM, and kasamtangang Provincial ASF Focal Person.

Agig pakighinabi ni Mr. Adolfo B. Erejer, drayber sa maong meat van, ang maong mga baktin gipanag iyahan ni Mr. Ariel B. Bation nga taga Brgy. Balulang, Cagayan de Oro City, Misamis Oriental. Siya nagto-o nga nagbyahe sila, uban sa usa pa nga si Adolfo Bacan, nga kumpleto ang dala nila nga dokumento. Apan sa pag-abot nila sa Nasipit, kung diin ila nang gina-og ang 6 ka baboy, ilang nahibaw-an nga wala diay nila nadala ang gikinahanglang mga papeles.

Ubay-ubay ang mga dokumento nga wala nila mapakita sa City Veterinary Office: 1. Veterinary Health Certificate; 2. Shipping Permit; 3. Livestock Carrier Registration; ug 4. Animal Handler’s License. Busa agig pagpahamtang ug silot sa tag-iya ubos sa kamandu-an sa DA-AO No. 5 Series of 2019 o ang giila nga Guidelines on Local Transport/Shipment of Animal Products and By-Products, sila gipamulta sa kantidad nga Php 1,000 alang sa 1st offense ug and pagpabalik sa maong mga baboy sa Lanao del Norte.

Sa karon, bisan pa ug nakontrolado na sa mga awtoridad ang pagkanat sa ASF sa atong dapit, hugot gihapon nga gipatuman sa probinsya ubos sa pagpangalagad sa atong Gobernador Robert Lyndon Barbers, ang strikto nga pagsulod gawas sa mga baboy nga nag gikan pa sa mga nagkadaiyang probinsya sa nasud tungod sa negatibong epekto niini sa atong ekonomiya kon ugaling kini makasulod ug matakbuyan ang tanan natong mga buhing baboy. (Provincial Media Affairs Office (PMAO))

(Source: Gov. Robert Lyndon S. Barbers Facebook page)

LEAVE A REPLY

Please enter your comment!
Please enter your name here