Davao City – Kapin sa 200 ka mga panimalay ang naugdaw sa nahitabong sunog pasado alas Dose sa udto kagahapong adlawa didto sa Purok 4, Isla Verde, Barangay 23-C, Poblacion, Davao City, alas 12:30 Miyerkules sa udto, Pebrero 20.
Sumala ni Senior Police Officer- 2 Ramil Gillado, ang deputy chief sa investigation section sa Bureau of Fire Protection-Davao nga miabot sa fourth alarm ang nahisgutang sunog sanglit dali kining midako ug kinahanglan daghang mga bombero ang motabang og palong sa kalayo.
Hinuon gipaklaro ni Gillado nga walay nakabsan sa kinabuhi sa maong hitabo, apan dunay pipila nga nangasamad human ilang gipangsalbar ang ilang mga gamit. Nasayran pa nga miabot sa tulo ka oras una pa na-kontrola ang kalayo samtang anaa sa gibana-bana nga P2 milyon ang danyos sa hitabo.
Ang mga nasunogan anaa na gipahimutang sa covered court sa Barangay 23-C ug sa Magsaysay Park samtang padayon ang gihimong validation sa City Social Services and Development Office (CSSDO) aron mahatagan og hinabang pinansyal ang mga biktima.
Gilayon usab nga mihatag og serbisyo ang Kusina ng Bayan sa CSSDO nga mihatag og pagkaon ingon man ang pagdunol sa mga social workers og mga habol, banig, ug uban pang gamit sa pagluto.