Sa ika 23 na regular session nan Sangguniang Panlungsod, opisyal na tag-sumite nan committee on rules pinaagi na kan councilor Kent Yuipco isip chairperson, an report kabahin sa sugyot-ordinansa para sa kasabutan tali na sa Philippine Primark Properties Inc., para na sa katukuran nan tianggihan dinhi sa ciudad nan Surigao puli na sa jaon kasamtangan na tianggihan.
Kun kadumduman nakapagawas na nan isa ka resolusyon an konseho na nagpabor sa kasabutan tali na sa Primark pero nahimo ini na way nada tungod kay sumaya pa nagkuyang an boto sa nagpabor nga nakakuha lamang nan unom ka mga boto sa pito na tagkinahanglan base sa pagsabot na sa regulasyon.
Nahimo anay na mainiton an paglantugi tali na sa mga konsehal nga nagpabor sanan mga konsehal na waya makapabor sa tinguha nan mga nahiuna na pagbotohan na dajon an isyu ubos sa prinsipyo nan urgent matter butang na tag-dilian nan mga waya makapabor sa tinguha na mapabotohan na dajon an sugyot ordinansa sa argumento na kinahanglan na muagi sa proseso na may una ikaduha sanan ikatuyo na pagbasa an tratamento nan isa ka ordinansa.
Sa kinauluhan nan diskusyon sa isyu, tagduso ngadto sa unang pagbasa an sugyot ordinansa inay na sa orihinal na interes na magpa-botohan na dajon an isyu.