Davao City – Dismayado si Comval Vice Governor Manuel “Way Kurat” Zamora gumikan misipot man sa Session Hall ang mga sakop sa KAPA-Community Ministry International, Inc. nga mas labing nailhan sa tawag nga KAPA kon Kabus Padatoon apan wala sila nantingog gumikan mihatag silag waiver nga dili sila pwedeng motubag sa himoong legislative inquiry.
Luyo sa ilang presensya gipadayon gihapon ang Question Hour sa 122nd Regular Session labot sa isyu sa KAPA kon Kabus Padatoon gumikan anaa sa Session Hall ang mga personahe sa National Bureau of Investigation (NBI) ug Security and Exchange Commission (SEC).
Si KAPA Comval Coordinator Sorahya Padilla uban sa duha ka Legal Counsel ug pipila ka mga miyembro ang mitambong sa maong sesyon. Gusto ni Vice Governor Zamora ug sa mga sakop sa Sangguniang Panlalawigan (SP) nga iisplikar sa KAPA ang ilang operasyon kung legal ba kini o kaha scam ilabina nga daghan na og mga nagpa-miyembro niini bisan ang mga empleyado sa Kapitolyo.
Giingon nga anaa sa 30 porsyento ang mahimong interest sa kwartang ihatag sa matag miyembro ngadto sa KAPA nga gitawag nilang “love offering” kon donasyon.
Hinoon sa mga nahimong miyembro niini sa ilang opisina sa Briz, Magugpo East, Tagum City ug sa Montevista, Comval Province ang misulting naka-harvest kon mikita na sila sa kwartang gihatag ngadto sa KAPA.
Matod pa ni Zamora nga maayo lamang ang nauna sa nahisgutang “pyramiding”. “Hayahay ang nag-una three to four months from now pero looy tong nabilin. Ang dilikado ani ang ending, in every pyramiding jackpot ang na una”, sumala pa ni Vice Governor Manuel “Way Kurat” Zamora.