Gilusad karon sa Cebu City Police Office (CCPO) ang subsob nga kampanya batok sa habal-habal ug ANGKAS ug sa tanang colorum vehicles nga padayong naglihok sa dakbayan sa Sugbo. Gisugdan sa kapolisan ang maong kampanya sa mi-aging buwan subay sa implementasyon sa Synchronized Enhanced Managing Police Operations (SEMPO).
Gipatuman sa CCPO ang maong operation nunot sa pagluwat sa Korte Suprema sa desisyon niini nga nagdeklarar nga illegal sa ANGKAS.Ang desisyon sa Korte Suprema maoy mibaraw sa naha-unang desisyon sa ubos nga hukmanan sa Metro Manila nga nagtugot sa ANGKAS pag-operate isip usa ka public transport.
Gibutyag ni CCPO Director Senior Supt. Royina Garma nga gukdon gyod nila ang tanang mohimo’g kalapasan sa R.A. 4136, ang na-ila nga Traffic Code of the Philippines. Gimando-an usab ni Garma ang Trffic Control Group nga panghingusgan pa gyod ang kampanya batok sa mga malapason sa Traffic Code.
Apan nagpadayon gihapon sa pag-operate ang mga HABAL-HABAL ug ang mga ANGKAS drivers nga wala na magsul-ob og uniporme bisan pa man sa gipakanaog nga desisyon sa Korte Suprema. Mokabat sa 49 ka mga HABAL-HABAL drivers ug 21 ka mga colorum vehicle drivers ang nasikop sa kapolisan atol sa pasi-unang pagpatuman sa SEMPO.
Samtang gipasalig ni Cebu City Mayor Tomas Osmena ngadto sa mga Habal-habal ug ANGKAS drivers nga hatagan kini sa binuwan nga rice subsidy epekto sa desisyon sa Korte Suprema.