CAGAYAN DE ORO CITY- Andam moresign gikan sa iyang katungdanan si Philippine Industrial Authority o Phividec Administrator Atty. Franklin Quijano kon kini imando kaniya ni Presidente Rodrigo Duterte kinsa mao ang nagtudlo kaniya alang sa maong posisyon.
Mao kini ang reaksyon ni Quijano sa laraw sa Misamis Oriental 2nd District Representative Juliette Uy tapos nahitabo nga nakasulod sa Phividec area diin nahimutang ang Mindanao Container Terminal ang tone-toneladang basura gikan sa Verde Soko sa South Korea apil na ang sa Hongkong ug Australia. Buot usab ni Congresswoman Uy nga bungkagon ang ahensya sa Phividec nga gipamunuan ni Quijano. Hinuon sa gisugilon sa maong abogado, dili tin-aw kon unsa ang katuyuan sa kongresista sa pagbungkag sa maong ahensya.
Kon madumduman, niadtong bulan sa Marso niining tuiga atol sa gipahigayon nga Congressional inquiry gipangayo niini ang pagsuspenso ni Quijano ug mga kauban gumikan sa maong kapalpakan.