Ipinagtanggol ni Pangulong Rodrigo Duterte ang pag-aresto ng mga pulis sa grupo ni dating Bayan Muna Party-list Rep. Satur Ocampo sa kasong kidnapping at human trafficking sa Talaingod, Davao Del Norte.
Matapos ang paggawad ng Quezon Service Award kay yumaong Senador Miriam Defensor Santiago sa Malakanyang, ipinunto ni Pangulong Duterte na malinaw namang may mga nag-reklamong lumad.
“I’ll leave it to the police. I support the police and military. You know an ordinary person, lalo na kung senador ka, you must be aware that you cannot remove children from one community to another without the consent of the parents, that’s actually kidnapping. Eh nagreklamo yung mga natives, you heard they were lectured upon by the lumad. And, it’s controlling the lives of the natives.” Pahayag ni Duterte.
Ayon sa pangulo, desperado na ang New People’s Army (NPA) na makapag-recruit ng bagong miyembro kaya’t mga katutubo na ang hinihikayat na sumapi sa kilusan kontra gobyerno.
Iginiit din ng punong ehekutibo na hindi naman lingid sa kaalaman ng nakararami na ginagamit lamang ng Communist Party of the Philippines (CPP) ang mga grupong Bayan Muna, kilusang Mayo Uno at Gabriela.
“Ayana ng mahirap sa mga komunista. Ginagamit nila ang Lumad kaya ang karamihan ngayon namamatay ay Lumad. Seventy-five percent of the armed soldiers of the New People’s Army are Lumads, kawawa eh. So, ayun ang mahirap sa kanila wala silang nakukuha eh.” Ani Duterte.