Davao City- Malampusong nadakpan sa hiniusang pwersa sa Criminal Investigation and Detection Group Southern Mindanao Region ug Malita Municipal Police Station ang Top 1 Most Wanted Person Municipal Level.
Ang dinakpan giila nga si Sylvestre T. Panayas, 56 anyos ang panuigon, Minyo nga molupyo sa Sityo Tabudukon, Barangay Tical Malita Davao Occidental kinsa nasikop atol sa gipahigayong OPLAN Pagtugis, Salikop at Omega.
Nasayran nga gipagula ni Hon Judge Magnolia C. Velez- Cayetano ang Presiding Judge sa Regional Trial Court 11 Branch 20 sa Digos City Davao del Sur gumikan sa duha ka ihap nga Kasong Murder and Attempted Murder nga giatubang ni Panayas.
Gihimo ang pagsikop kay Panayas pasado alas 9:30 sa kabuntagon niadtong usa ka adlaw didto sa may Sityo Bilibak Barangay Tical Malita Davao Occidental. Nakuha sa iyang posisyon ang usa ka kalibre 45 nga Infinity Pistol ug usa ka Buhing bala.
Nasayran pa nga ang dinakpang si Panayas usa lamang sa miyembro sa GAPO GC kinsa nalambigit sa Gun for Hire ug Gun Running hinungdan nga giila usab kini nga Number One Most Wanted person sa Malita Davao Occidental.