Nagplano karon ang National Economic Development Authority sa Central Visayas (NEDA-7) nga ipatuman ang gitawag nga pedestrianization sa downtown area sa siyudad. Kini nagpasabot nga tak-opan ang mga kadalanan sa downtown area diin nahimutang ang mga makasaysayanong business hub.
Gibutyag ni NEDA-7 Regional Director Efren Carreon nga nagplano ang ilang ahensya nga mopasiugda sa usa ka pagtuon aron pagtino sa economic impact sa higayon nga ipatuman ang pedestrianization. Gitumbok nga ang paglakaw maisip nga labing praktikal nga solusiyon aron nga masulbad ang migrabe nga problema sa traffic congestion.
Matud ni Carreon nga ang pagdasig sa publiko paglakaw na lang ilabi na sa mga business centers makaayo sa panglawas ug sa ekonomiya ug environment friendly nga lakang pagsulbad sa traffic problem.
Sa iyang bahin gibutyag ni Cebu City Administrator Nigel Paul Villarete nga bukas ang city government sa pagtuki sa posibilidad nga ipatuman ang pedestrianization sulod sa business districts sa downtown area. Apan gipasabot ni Villarete nga ang pedestrianization scheme wala magpasabot nga hingpit nga did-an pagsulod sa downtown area ang mga motor vehicles.
Ang mga dapit nga ilakip isip test areas sa pedestrianization mao ang usa ka bahin sa Barangay Pari-an ug ang mga kadalanan dapit sa Cebu Metorpolitan Cathedral, Basilica Minore del Sto. Nino, Magellan’s Cross, Plaza Independencia ug Fort San Pedro.
Ang maong pagtuon (NEDA-7 Commission Study) mogasto baleg 3.5 milyones pesos ug maglambigit sa kinatibuk-ang road length nga 4.59 ka kilometro.