CAGAYAN DE ORO- Giaresto sa otoridad kagahapon, Octobre 8 ang 17 anyos nga menor de edad nga batan-ong lalaki tungod sa pasangil nga kini nanglugos sa 28-anyos nga batang babaye nga taga Philstate, sakop sa barangay Gusa ning dakbayan. Matud pa ni Chief Inspector Ericson Sabanal, ang Police Station 3 Commander nga ang suspect posibleng mag-atubang sa kasong frustrated murder o frustrated homicide charges.
Ang reklamo sa pagpanglugos gitakda nga isang-at sa higayon nga duna nay resulta sa medical examination sa biktima.
Sumala pa ni Sabanal ilang ibutyag ang identity sa suspect sa higayon nga masang-at na sa korte ang kaso.
Pinaagi sa hot pursuit operation, natiktikan na gyod sa kapolisan ang gitaguan sa suspetsado tapos kini gisumbong ra usab sa iyang mga kauban sa mga police.
Nasayran nga ang biktima nakauban sa grupo sa suspetsado sa ilang panag-inom sa Corrales Avenue ayha gedala sa suspetsado ang biktima ngadto na sa crime scene niadtong Biyernes. Pagkaugma niini nga hitabo, ang biktima nga usa ka residente sa Patrick Cronin Camaman-an nakaplagan na lamang nga naghigda sa yuta nga way panimuot, wala nay sapot ug adunay samad ang iyang baba. Gikuha kini sa mga myembro sa Oro Rescue Team ang biktima ug dali nga gidala sa hospital aron mahatagan sa tukmang pagpanambal.
Hangtud kagahapon, nagpabilin pang unconscious sa tambalanan sa intensive care unit samtang nabilanggo na sa detention facility sa kapolisan ang suspetsado.