Gibutyag sa kadagkoan sa Cebu Provincial Police Office (CPPO) nga aduna’y pipila ka mga piniling opisyal sa dakbayan sa Talisay ang giingong mga drug protectors. Gibase kini sa intelligence report nga padayon pa nga gi-validate sa CPPO.
Matud ni CPPO Director Sr. Supt. Manuel Abrugena nga ang illegal drug trade sa dakbayan sa Talisay nagpadayon gihapon bisan pa man sa sunod-sunod nga police operations sanglit ang ubang drug personalities giingong aduna’y proteksyon gikan sa mga hingtungdang local officials. Gitataw ni Abrugena nga dili pa nila mahimo’ng ikabutyag ang mga pangan sa gitumbok nga mga protektor sa illegal drug trade kay padayon pa man nila kining gi-validate.
Ang Provincial Intelligence Branch (PIB) maoy gisangonan sa paghipos og ebidensya batok sa mga local officials nga giingong nagdawatan og kwarta gikan sa mga drug syndicates, sumala pa ni Abrugena. Kahinumduman nga mismo si Presidente Rodrigo Duterte kinsa miduaw sa Sugbo niadtong buwan sa Agosto 2018, mihulagway sa Talisay City nga “hot bed” sa illegal drugs.
Nagdumili ang ubang mga opisyal sa Talisay City paghatag sa ilang mga komentaryo labot niini apan sa iyang bahin, gipadayag ni Talisay City Councilor Antonio Bacaltos, Jr. nga iyang gihangop ang imbistigasyon sa kapolisan kay siya usab gusto man nga masulbad na gyod ang problema sa illegal drugs sa Talisay City.