Davao City – Mga nag-unang panginahanglanon sa katawhan maoy tumong sa programang pagbabago, gibutyag ni Davao City Mayor Sara Duterte-Carpio sa iyang pagtambong sa “Paskuhan sa Kapatagan” didto sa probensiya sa Davao del Sur. Matud ni Mayor Sara Duterte nga angayang matagad sa Hugpong ng Pagbabago ang mga nag-unang suliran kon diin sa dakbayan sa Davao kanunay nilang gilantaw ang katawhan sa kabukiran.
Nagtawag sab kini og mga batang tinun-an nga gipasaka sa entablado ug gipangutana kon unsang kurso ang gusto nila inig dako dungan sa pahimangno nga ayuhon ang pagtuon. Sa iyang pagpamulong, gipahimangnoan niini ang mga ginikanan sa ilang mga responsibilidad sa ilang mga anak.
“Dili nato pasagdan atong mga anak nga magutom, hatagan nato og saktong edukasyon ug angayang magplano ta sa atong pamilya aron pati atong mga apo dili maglisud,” asoy ni Duterte-Carpio.
Sumala pa sa Mayor nga buot sab sa programa sa HNP nga ipatigbabaw ang kalinaw alang sa hapsay nga pagpuyo sa tanang katawhan sa mga barangay. Gipabuhagay niya nga dako og pagsalig ang partido kang Kapatagan ug ABC Pres. Juanito Morales mao ang hinungdan nga siya gipili nga modagan pagka-Congressman.
Matud niini nga angayang suportahan sa 245 ka barangay sa probinsiya si Morales aron nga moasenso na ang ilang dapit. Si Duterte-Carpio nagbutyag sab nga si Digos City Mayor Joseph Peñas ang angayan nga mahimong gobernador aron hingpit nga magmalinawon ug molambo na ang Davao del Sur.
“Dapat 11-0 kay kung dili kaalyado sa mga mayor ang modaug gikan sa gobernador samot nga moatras ang Davao del Sur,” panapos ni Mayor Sara.