Dugang mga kasong administratiba ug criminal ang gi-atubang karon ni Mandaue City Mayor Gabriel Luis Quisumbing epekto sa pagpabalhin sa mga opisyal sa Mandaue City Office of the Building Official (OBO). Gisang-at ni City Engineer Andres Suson ngadto sa Office of the Ombudsman-Visayas ang mga kasong graft,grave misconduct,oppression, ug kalapasan usab sa Civil Service Law batok kang Mayor Quisumbing.
Sa iyang reklamo ngadto sa Visayas Anti-Graft Office, gipadayag ni Suson nga niadtong May 18, 2018, gibalhin siya sa mayor ngadto sa Umapad Dumpsite Task Force.Tungod niini, midangop ngadto sa buhatan sa Civil Service Commission ang complainant ug gireklamo ang kasugoan ni Quisumbing nga nagpatuman sa iyang reassignment ngadto sa Umapad Dumpsite Task Force.
Niadtong Agosto 17, 2018, gimandoan sa Civil Service Commission si Quisumbing pagpabalik kang Suson ngadto sa iyang orihinal nga pwesto sa City Engineer’s Office apan gibalewa’ sa mayor ang mando sa Civil Service Commission , matud pa sa complainant.
Gi-awhag usab ni Suson ang Ombudsman-Visayas nga ibutang ubos sa Preventive Suspension ang mayor samtang nagpadayon pa ang imbestigayon batok kaniya. Sayo niini, gireklamo usab ngadto sa Ombudsman-Visayas si Quisumbing gumikan sa iyang pagtangtang ug pagbalhin ngadto sa laing pwesto sa kanhi pangulo sa Human Resource Management Office sa Mndaue City.