Davao City- Nagpadayon karon ang gihimong Validation sa mga listahan nga benepisyaryo sa Social Pension Program ilawom sa Department of Social Welfare and Development Southern Mindanao Region. Kini ang gikomperma ni DSWD Regional Director Meredith Jabagat kagahapong adlawa atol sa pakighinabi sa mga sakop sa Media sa usa ka hotel ning syudad sa Davao.
Sumala pa ni Jabagat nga gihinay hinay na ug tanggal sa buhatan ang mga pangalanng benepisyaryo sa Social Pension Program kinsa eksistido usab nga anaa ilang pangalan sa Social Security System ingon man sa Government Insurance System Pension. Buot lamang sa DSWD nga ang mga mamahimong makabenepisyo sa Social Pension ang mga kabus nga Senior Citizen sa rehiyon.
“Since daghan naapil sa SSS and GSIS, gusto ni President na mag clean listing mi sa SocPen, mag revalidate kay naay uban tiguwang dili mag-sulti ug tarong. Dili daw sila SSS pensioners, pag pangayo namo ug record sa SSS, pensioner man diay”matud pa ni Jabagat.
Tungod niini, gipasabot ni Jabagat nga sa pagka karon dili una mahitabo ang Quarterly Payout sa Social Pension Program hangtud nga dili mahuman ang Validation Process sa buhatan. Hinuon, nasayran nga katunga na sa listahan sa mga Pensioners ang napa ilawom na sa Validation ug gilauman kining matapos sa bulan sa Hunyo ning tuiga diin lauman usab nga madawat na ang mga Social Pension matag Semister inay nga Quarterly.
Kahinumduman nga gipatuman ang nahisgutang Programa sa Department of Social Welfare and Development pinasubay sa napasar nga Expanded Senior Citizens Act of 2010 kun ang Republci Act 9994. Ilawom sa nahisgutang balaud, ang 60 anyos pataas nga matag individual makadawat ug kantidad sa Kinyentos (500) pesos nga Monthly Pension kung ugaling ang nahisgutang individual hinay na ang lawas, masakiton ug Disabled person nga way ginadawatang pensiyon sa ubang ahensiya sa Kagamhanan. Mamahimo usab nga benepisyaryo ang mga senior Citizen nga way igong kinitaan kun way klarong source of income.