Liboan ka mga biktima sa landslide sa Sitio Sindulan, Barangay Tina-an sa Naga City, Cebu makabalik na gyod sa ilang mga pinuy-anan atol sa kasaulogan sa pasko.
Gibutyag ni Naga City Mayor Kristine Vanessa Chiong nga mahimo na nga makabalik ang mga biktima sa landslide ngadto sa ilang mga pinuy-anan sunod semana. Matud ni Chiong nakadawat na siya og kopya sa harmonized assessment gikan sa Mines and Geo-Sciences Bureau (MGB-7).
Ang maong dokumento nagpakita ug nagtino kon unsang mga dapit ang mamahimong kapuy-an palibot sa landslide site. Subay sa maong assessment sa MGB-7, ang dapit nga gitumbok nga critical zone gideklarar nga off-limits alang sa mga residente.
Gipasabot hinuon ni Chiong nga ang mga apektado nga mga residente gikinahanglang mo-agi sa information, education and communication (IEC) briefing gikan sa city government aron kini makasabot sa kakuyaw ug risgo sa higayon nga mobalik na sila sa ilang mga pinuy-anan.
Apan mokabat sa 444 ka mga pamilya kansang mga pinuy-anan nahimutang sa critical zone gidid-an nga makabalik sa ilang mga lugar. Kahinumduman, dul-an sa usa ka gatos ka mga residente ang nakalas atol sa landslide sa Barangay Tina-an, Naga City niadtong Septiembre 20, 2018.
Samtang gipasalig ni Governor Hilario Davide III nga andam ang provincial government nga modonar og dugang mga luna aron magamit nga relocation site sa mga biktima sa landslide.