Kadagkoan Sa Toledo City, Cebu Nag-Atubang Og Imbestigasyon Tungod Sa Posibleng “Plunder”

by RPN
0 comment
Kadagkoan Sa Toledo City, Cebu Nag-Atubang Og Imbestigasyon Tungod Sa Posibleng “Plunder”

Gisugdan karon sa Fraud Audit Office (FAO) sa Commission on Audit (COA) 7, ang kwestiyonable nga pagpagawas sa Toledo City Government sa 210 milyones ka pesos nga “public funds” sa nakalabay’ng tuig.

Si Atty. Pablo John Garcia niawhag sa “auditing office” sa COA7 pagpagawas sa Certified True Copies sa mga dokumento nga naglambigit sa pagpagawas sa minilyon ka pesos nga “public funds”.

Samtang pormal usab nga giawhag ni Garcia ang Office of the Ombudsman- Visayas pagsusi sa posibleng “plunder” sa nahisgutang “public funds” nga gigamit pagsweldo ngadto sa mga “job order (JO) employees” ubos sa Clean and Green Program sa Toledo City.

Nakahukom si Garcia pagdangop ngadto sa Visayas Anti-Graft Office gumikan sa kapakyas sa COA7 paghatag sa gipangayo niya nga mga dokumento.

Gitataw ni Garcia pinasikad sa iyang suwat ngadto sa Visayas Ombudsman nga subay sa Clean and Green Program sa Toledo City, pipila ka mga opisyal sa nahisgutang siyudad nga naglakip sa Executive Assistant to the Mayor, City Administrator ug ubang mga Konsehal maoy miduso sa mga JO “employees” nga magdawat baleg tag 350.00 pesos nga sweldo matag adlaw.

Apan gipasabot ni Garcia nga ang mga dokumento nagpakita nga ang mga tawo nga gipatrabaho ubos sa Clean and Green Program, mga “ghost employees”, “fictitious persons” o kaha mga tawo kansang mga pirma gisundog o kaha mga tawo nga wala gyod magtabaho sa siyudad.

Giawhag ni Garcia ang Visayas Anti-Graft Office nga imbestigahon ang mga hingtungdang mga opisyal lakip usab kang Toledo City Mayor John  Henry Osmeña.

Si Garcia kandidato pagka-kongresista sa ika-tulo nga distrito sa Sugbo ug maoy iyang mga kaatbang si Osmeña ug si kanhi Pinamungahan Mayor Geraldine Yapha.

Related Posts

Leave a Comment