Davao City – Way nahimo ang tagdumala sa usa ka Investment Scheme nga misulod sa syudad sa Davao human sila gipailawom sa Inspection sa Anti Scam Unit sa lokal nga kagamhanan kauban ang Police Regional Office XI kagahapong adlawa. Mismo nga si Regional Director General Marcelo Morales ang nangulo sa gihimong inspection sa Jogle Innovative Marketing nga nahimutang sa Molave Street, Rocnan Village Barangay Maa ning syudad sa Davao.
Nasayran sa mga dokumento nga gipanag-iyahan sa usa ka Glenn oliveros Panarez ang nahisgutang Investment scheme nga misulod sa dakbayan sa Davao luyo sa pahimangno ni Davao City Mayort Inday Sara Duterte nga gidid-an niini ang pagsulod sa mga Illegal nga Investment scheme sa syudad.
Human masuta sa Anti-Scam Unit nga walay Business Permit ang Jogle Innovative Marketing temporary kining gipaserado samtang si Panarez gimanduan nga makigkita kay Atty. Marissa Marasigan- Torentera ang Officer in-Charge sa Business Bureau aron sa pagkompleto sa mga rekisitos alang sa Business Permit niini.
Nasayran nga nasupak sa Jogle Innovative Marketing ang Ordinance number 0291-17 Series of 2017: An Ordinance Amending the 2005 Revenue Code of Davao City kun mas naila nga 2017 Revenue Code of Davao City.