Davao City – Human nga daghang katawhan ang nakapahimulos sa migula nga mga Investment Scheme sa Rehiyon Onse ug way bisan usa nga nag invest ang mireklamo, daghan karon ang suhistiyon nga himuong Legal ang Investment Scheme sa Mindanao ug Visayas.
Kabahin sa Department of Interior and Local Government Southern Mindanao Region, suportado sa buhatan ang nahisgutang sugyot sa katawhan. Sumala pa ni DILG Regional Director Alex Roldan nga mas maayong i-regulate o himuong Legal ang nanggawas karon nga mga Investment Scheme sa rehiyon onse nga naghatag ug dako kayo nga interest.
Gipasabot ni Alex Roldan nga mas maayong dunay saktong mga dokumento ug rehistrado sa Securities and Exchange Commission ang mga kompanya nga naghimo ug Investment scheme sa rehiyon. Pinaagi matod pa niini, mamahimong klaro sa mga nagabutang og kapital kung asa mapadulong ang ilang kwarta ug unsa usab ang ilang makuha niini.
Kahinumdumang nanggawas ang mga impormasyon nga pasangil sa pipila ka mga nidumala sa investment schemes, nga dunay mga investments sama sa foreign stock exchange, diin kakuhaan sa interest sa gibubo nga kapital. Pagpasabot ni Roldan, walay nagdili sa bisan unsang kompanya nga musulod sa financial industry, apan, kinahanglan lamang matod pang i-regulate kini aron dunay usab klarong pagpasabot sa katawhan. Ang SEC ang mu-regulate sa maong industriya diin sutaon kung pila ang capital ug asa usab makuha ang interest nga ihatag sa katawhan.
Kahinumduman nga kagahapong adlawa lamang, gisampulan sa Anti-Scam Unit sa Lokal nga Kagamhanan ang Jogle Innovative Marketing nga temporaryong isarado sanglit way napakitang Business Permit ang tagdumala niini ngadtu sa Kapolisan.