Inilalatag na ni Pangulong Rodrigo Duterte ang isang executive order para sa pagbibigay ng insentibo sa mga negosyo sa labas ng Manila.
Ito ay upang ma-decongest ang Metro Manila at bilang paghahanda na rin sa tinatawag na “the big one” o ang posibleng pagtama ng 7.2 magnitude na lindol sa Metro Manila.
Ayon kay Presidential spokesman Salvador Panelo, inilatag sa cabinet meeting noong Lunes ang naturang plano kay Pangulong Duterte.
Gayunman, hindi tinukoy ni Panelo kung anong partikular na insentibo ang ipagkakaloob ng Malacañang sa mga negosyante na maglalagak ng negosyo sa labas ng Metro Manila.
Bukod sa mga incentives, inirekumenda rin ng ilang cabinet members ang pagtatatag ng Department of Resiliency at ang pagsusumite sa lahat ng ahensiya ng public service continuity plans bilang paghahanda sa malakas na lindol.