Davao City— Gikomperma ni Department of Education Spokesperson Jenelito Atillo nga dili mamahimong babag sa Graduation Rites sanglit dili pugson ang mga ginikanan nga kolektahan sa Graduation fee.
Gipasabot ni Atillo nga kong ugaling dunay mga balayrunon ang mga ginikanan diha sa Parent Teachers Association, ila ra usab kining gikasabutan apan nagpabilin kining dili pinugsanay ug ginatugutan gihapon ang ilang mga anak sa Kindergarten, Grade 6 ug Grade 12 nga makapaso sa Graduation.
Hinuon gibutyag sa tigpamaba sa Department of Education sa Rehiyon Onse nga dunay tulubagon usab ang mga ginikanan pinasubay sa ilang gikasabutan sa PTA nga mga balayrunon alang usab sa kaayuhan sa matag Classroom nga magamit sa ilang mga anak.
Giingon ni Atillo nga aduna gihapoy ipahigayong graduation rites ug mga Commencement Exercises sa Grade 6 pupils ug mga Grade 12 students samtang gitawag nga “Moving Up Ceremony” alang sa mga Kindergarten.
Gibalik-balik ni Atillo nga alang sa mga magtutudlo ug principal, nagpahimangno kini nga dili mangolekta og graduation fees gikan sa mga ginikanan subay sa ilang palisiya, apan kung duna may amotan didto na kini moagi sa PTA.
Dugang sa opisyal nga di kinahanglan nga enggrande ang graduation, inay himuon lamang kini nga simple apan makahuluganon alang sa tanan.