Malampuson nga gipahigayon ang programa sa wreath laying alang sa ika-77 nga paghinumdom sa kamatayon ni General Torres Paulino Santos Sr. nga gihimo sa Plaza Heneral Santos August 29, 2022.
Gipangunahan sa Local Government Unit, Joint Task Force ug PNP ang programa tinambungan sa mga taga Sangguniang Panlungsod, department heads, division heads, managlahi nga grupo, kaliwatan ug Pioneers and Descendants, ug mga sakop sa media alas 6 sa buntag.
Nauna ang flag ceremony unya gisundan sa 21 gun salute unya ang pasunod nga pagbutang og bulak sa ubos sa estatwa ni Gen. Santos gikan sa LGU ug sa managlahi nga grupo.
Ang nagahatag mensahe ang Besi Mayor nga si Rosalita Nuñez, Mayor Lorelie Pacquiao ug ang representante si Congressman Loreto Acharon nga si Konsehal Richard Atendido.
Managsamang gidayeg sa tulo ang nahimo ni General Paulino Santos alang sa kalambuan ug kalinaw sa unom ka settlement areas kung asa kini gi-assign kanhi ni Pangulong Manuel L. Quezon kaniadtong Pebrero 27, 1939.
Gisaysay usab ni Francisco Santos ang mga sakripisyo nga naagihan sa iyang lolo isip usa ka sundalo unya sa dihang niabot ang mga sundalong Japanese hangtud kini namatay sa edad nga 55-anyos gumikan sa pneumonia kaniadtong August 29, 1945 sa Kiangan.
Kahibaluan nga sa kalampusan ni General Paulino Santos ug isip dakung pasidungog og pagpasalamat kaniya gialisdan ang pangalan sa kanhi municipality of Buayan ngadto kay General Santos sa tuig 1954.