Sarangani Province – Malipayong gibalita karon ni Doctora Aileen Brion, ang chief of hospital sa Sarangani Provincial Hospital, nga epektibo Nobyembre 5 karong bulana, hingpit nang gideklara sa Department of Health Region 12, pinaagi sa pagpagawas og License to Operate, nga usa na ka Level 1 hospital ang provincial hospital sa Sarangani Province.
Gani, sugod atong adlaw nga Martes, Nobyembre 16, gisugdan na ang pagpang-opera sulod sa Sarangani Provincial Hospital. Masadyaong gipabalo ni Dra. Brion nga usa sa malampuson nilang gi-operahan atong Martes ang pasyente nga nakasinati og ruptured ectopic pregnancy, nibuto ang fallopian tube o tubo gumikan wala mahiluna sa matres sa pagpanganak.
Segun ni Dra. Brion, pwede na silang maka-opera sa emergency ug elective cases hilabi na sa mga pasyente nga pigado ang pinansyal. Ma-akomodar nila ang appendicitis/appendectomy, danlak/herniorrhaphy ug caesarean delivery sa pagpahimugso og bata.
Mudawat usab sila bisan kadtong may high-risk pneumonia, pwede napud makapa-xray ug mag-abuno og dugo, gina-plastar na usab ang serbisyo sa 2-D Echo ug ultrasound. Secondary na ang klasipikasyon sa laboratoryo ug gitinguha nga mahimo pa kining tertiary laboratory.
Walay pagabayran basta aduna lay Philhealth ang indigent nga pasyente tungod nagatuman man ang Sarangani Provincial Hospital sa palisiya nga “no balance billing,” mugawas na lang ang pasyente nga wala o dyutay ra ang bayran. Subay usab kini sa direktiba ni Governor Steve Chiongbian Solon nga dili palisdan ang mga pasyente.
Dako ang pagpasalamat ni Dra. Brion kuyog si Provincial Health Officer Dr. Arvin Alejandro sa pagka-upgrade sa Sarangani Provincial Hospital. Gumikan kini matud pa sa bug-os nga pagsuporta ug direksyon nga gilatag sa mga opisyales sa probinsya sa pagpanguna ni Governor Solon kauban sila Vice Governor Elmer De Peralta ug tanang board member, sila Board Member Irish Arnado ug Board Member Joseph Calanao sa komitiba sa health ug finance, sa dakong pag-ayuda pud nila Senador Manny ug Congressman Ruel Pacquiao sa infrastructure component, dinuyugan sa mga aktibong personahe sa hospital.
Dako usab nilang gipasalamatan ang hugot nga pag-abag sa Department of Health sa pamunuan nila Secretary Francisco Duque ug Regional Director Doctor Aristides Tan sa walay puas nga kaayuhan.
Sa bag-uhay lang nga pagbisita ni Regional Director Tan, nikabat sa ₱ 95.5-Milyones ang kantidad sa iyang dungag gibitbit nga mga modernong hospital equipment.
Sa mao nga ₱ 95.5-Milyon nga balor sa mga hospital equipment, ₱ 25-Milyones niini ang nahatag ngadto sa Sarangani Provincial Hospital. Hinungdan nga gibutyag ni Dra. Brion nga kung hospital equipment ug infra component lang ang hisgutan, andam na ang Sarangani Provincial Hospital nga mahimo nga Level 2 hospital.
Samtang, nakadawat og ₱ 20-Milyon nga kantidad sa mga hospital equipment ang Glan Municipal Hospital, ₱ 10-Milyon sa Malungon Municipal Hospital, ₱ 6-Milyon sa Maitum Municipal Hospital, ₱ 14.5-Milyon sa Maasim Municipal Hospital, ug ₱ 20-Milyon sa Kiamba Municipal Hospital.
Kini nga mga municipal hospital ang gipanag-iyahan ug gipadagan sa Provincial Government sa Sarangani kung diin tulo (3) ka municipal hospital ang nauna na nga nahimo nga Level 1 municipal hospital, nahitabo tanan sulod sa termino ni Governor Solon.
(Source: PIO Sarangani, photos courtesy by Jake Narte)