General santos City–Generally peaceful ang pagsugod sa klase sa tanang tunghaan dinhi sa syudad sa Gensan. Kini ang gibutyag ni Police Lt. Col. Aldren Gonzales, Spokesperson sa Gensan City Police Office.
Matud niini nga walay natalang insidente nga may kalabutan sa pag-abli sa klase nga natala ang kapulisan sa tibuok syudad sugod atong adlaw nga Lunes.
Una nang gimando sa Higher Headquarters sa PNP nga magpatuman ug maximum deployment sa PNP personnel sa mga tulunghaan nga gikinahanglan butngan ug tropa sa kapulisan.
Samtang gibutyag ni Police Lt. Col. Gonzales nga sa mga lagyo nga eskwelahan sa Gensan nga adunay gamay lang nga ihap sa mga estudyante, ila nalang ginabisitahan pinaagi sa ilang patrol.
Apan gipaklaro niini nga aduna usab silay koordinasyon ngadto sa principal ingon man sa mga force multipliers nga mitabang kanila sa pagbantay sa mga tulunghaan nga anaa sa hilit nga bahin sa syudad.
Tumong niini aron nga bisan wala silay personahe nga nakadeploy, aduna gihapoy magbantay sa maong tunghaan.
Samtang giangkon usab ni Lt. Col. Gonzales nga kulang gyud ang ihap sa PNP personnel mao nga nakig-alayon sila sa mga force multipliers aron sila matabangan sa pagbantay sa seguridad sa mga tunghaan.
Pinaagi sa force multipliers mapun-an matud pa ang kakulangan sa PNP personnel nga anaa sa mga tunghaan.
Samtang gawas sa pagbantay sa seguridad sa mga eskwelahan, ang PNP una nang mitabang sa mga aktibidad sa nagkadaiyang tulunghaan sa Gensan sama nalang sa brigade Eskwela ug uban pa. (Alfred Madas Jr.)