General Santos City – Ginahulat nalang ang notice to proceed aron masugdan na ang konstrasksyon sa Mabuhay Underpass sa dakbayan. Kini ang gibutyag ni Engr. Clare Bantayan, gikan sa DPWH-Bureau Of Construction sa Central Office sa DPWH.
Saysay niini nga na-award na sa Vicente Lao Construction ug anaa na sa buhatan ni DPWH Secretary Roger Mercado ang kontrata ug ginahulat nalang nga mapirmahan.
Pagpaklaro niini nga 2021 pa ang pondo sa maong proyekto ug na-extend lang karong 2022 rason nga kinahanglan na nga masugdan ang maong underpass.
Dugang pamahayag ni Engr. Bantayan nga aduna gyuy epekto sa trapiko ang pagtrabaho sa underpass kung asa mulungtad ug 240 ka adlaw ang unang phase.
Subay sa gi-aprubahan sa hawanan sa konseho gikan Hunyo 15 ngadto Pebrero uno sunod tuig ang konstraksyon niini.
Aduna nay nahan-ay nga rerouting plan ang Public Safety Office para sa mga pribadong sakyanan ingon man ang mga pampasaheruan nga labing maapektuhan.
Kalabot niini, gibutyag ni Engr. Bantayan nga adunay mga proyekto nga ginasugdan bisan ug walay notice to proceed sama sa mga hospital niadtong panahon sa pandemya.
Gipaniguro usab niini nga matapos sulod sa 240 kaadlaw ang unang phase sa underpass ilalom sa Vicente Lao Construction.
Saysay niya nga higayon nga mulampas sa 240 kaadlaw, dili matud pa nila bayaran ang maong construction firm. (John Rey Somido)