General Santos City – Naka-implementa na ang halos tanang rehiyon sa nasud ug minimum wage increase gikan niadtong bulan sa Hunyo kung asa sa rehiyon 12 na-implementa na ang kinatibuk-ang 32 pesos nga umento sa inadlaw nga sweldo niadtong Setyembre uno.
Sumala kang DOLE Secretary Benviniedo Laguesma, nga nakapahigayon na sila ug panagpulong sa mga negosyante sa Rehiyon 12 kung asa sagad kanila ang wala pa hingpit nakarekober gumikan sa pandemya hilabina na sector sa panagat.
Usa matud pa sa ilahang hangyo mao ang temporaryong pagsuspendi sa 32 pesos nga umanto apan subay sa wage order kinahanglan kining ipatuman sa tanang kumpanya.
Dugang pamahayag ni Secretary Lageusma nga sa karon, wala pa silay nadawat nga unsa mang reklamo kabahin sa mga employer nga wala nituman sa umento sa sweldo.
Samtang gihatagan na niini ug direktiba ang DOLE 12 nga i-monitor ang tanang kumpanya sa rehiyon aron masigurong tanan ang mutuman sa gipagawas nga wage order.
Pagpaklaro niini nga tumong sa wage order mao ang matabangan ang tanang mga empleyado apan siya nanghinaut nga walay dakong epekto ngadto sa mga kumpanya ang 32 pesos nga umento sa inadlaw nga sweldo. (Alfredo Madas Jr.)