General Santos City – Andam na ang COMELEC Region 12 para sa umaabot nga Barangay ug SK election sa Disyembre 5 ning kasamtangang tuig.
Sumala kang Atty. Jose Villanueva, Assistant Regional Director sa COMELEC Region 12 nga human ang gihimong voter’s registration, ilaha nalang gina-finalize ang listahan sa mga botante.
Sa kasamtangam ilaha nalang ginahulat nga ma-aprubahan ang pondo para sa pag-imprinta sa mga balota nga gamiton sa filing sa certificate of candidacy ingon sa adlaw mismo sa piniliay.
Pagpaklaro ni Atty. Villanueva nga bisan pa man ug na-aprubahan sa kongreso ang pagsibog sa Barangay ug SK election sa Disyembre sunod tuig, hangtud nga walay pirma sa presidente, dili kini mahitabo rason nga sila sa COMELEC ang padayon nga naga-andam.
Saysay niini nga higayon nga dili mahinayon ang piniliay sa bulan sa Disyembre, dili ingon ka dako ang epekto niini sa preparasyon sa COMELEC gumikan manual ang maong eleksyon.
Sa karon, ilaha lang matud pang ginasuta ang kinatibuk-ang ihap sa mga botante sa rehiyon ug ang ihap sa mga polling precinct nga gamiton.
Dugang pamahayag ni Atty. Villanueva nga kung mahinayon ang eleksyon sa Disyembre, wala nay mahitabo nga voter’s registration, apan kung ma-postpone, adunay Voter’s Registration sa bulan sa Oktubre ug Nobyembre.
Samtang sa ihap sa mga botante sa Rehiyon 12, anaa matud pa sa 2.6 million apan ilahang gilauman nga kini madugangan pa o mabawasan gumikan sa mga transfer of entries.
Ma-finalize lang matud pa ang listahan sa mga botante usa ka bulan ayha ang eleksyon. (Alfredo Madas Jr.)