General Santos City – Gi-inagurahan ni Congresswoman Shirlyn Bañas-Nograles ang Baluan Balut Park niadtong Disyembre 23, 2021 sa Baluan Plaza, Brgy. Baluan, General Santos City. Gipahayag niya uban ang garbo ug kadungganan nga sa hiniusang paningkamot sa mga tawo, luyo sa proyekto – usa ka iconic nga istruktura nahimo na karon nga bag-ong landmark sa lungsod.
Ang ribbon-cutting ceremony gipangulohan sa Congresswoman kauban si DPWH District Engineer Engr. Mamintal Taha, City Councilor Hon. Lourdes Casabuena, Brgy. Kapitan Armando Diamante, TESDA Sargen Provincial Director Mr. El Cid Castillo.
Gihatagan og gibug-aton sa Kongresista nga kining iconic park gitukod sa Barangay Baluan aron makatag ang kalamboan sa dakbayan.
“Kasi kung ang tanan nga mga development projects atong ibutang sa Central District sa siyudad, moabot gyud nga maghuot gyud ang Central District busa kinahanglan natong katagon ang kalamboan sa siyudad sa General Santos,” matud pa sa Congresswoman.
Nagtuo si Cong. Bañas-Nograles nga kini mahimong ganghaan alang sa dugang nga pag-uswag sa ekonomiya, promosyon sa kultura, ingon man suporta sa mga mag-uuma sa agrikultura. Ang pag-establisar sa Baluan Balut Park nagtuyo usab nga adunay mas dakong epekto sa komunidad, sa katawhan sa Baluan, ug sa mga Heneral sa kinatibuk-an.
Sa kataposan, ang Congresswoman nagpasalamat sa mga buhatan nga nahimong posible nga mahuman ang proyekto, lakip na si City Mayor Ronnel Rivera sa iyang walay kataposang suporta gikan pa sa pagsugod sa proyekto. Nagpasalamat usab siya sa mga buhatan sama sa TESDA, DPWH, ug Brgy. Kapitan sa Baluan Armando Diamante ug mga sakop sa konseho alang sa ilang hiniusang paningkamot.
Ang maong proyekto opisyal usab nga gi-turn over ni Engr. Mamintal Taha ngadto sa Brgy. Kapitan Armado Diamante, nga gidawat usab sa naulahi uban ang dungog. Gipasalig usab ni Kapitan Diamante ngadto sa Kongresista nga siya ug ang iyang mga sakop sa konseho maoy moatiman sa maong parke sanglit kabilin kini sa matag molupyo sa Barangay Baluan.