General Santos City—Mukabat sa 867 ka mga gagmayng negosyante gikan sa Gensan, ang makadawat ug Livelihood Assistance Grant (LAG) gikan sa Department of Social Welfare and Development (DSWD) Field Office XII.
Gisugdan ang pagpanghatag sa maong ayuda kagahapong adlawa, Setyembre 5, 2022 ug mahuman karong adlawa.
Matud ni Edgar Guerra, Regional Program Coordinator sa Sustainable Livelihood Program (SLP), gihimo ang LAG payout sa Trade Hall sa SM City General Santos kung asa ang mga benepisyaryo ang makadawat ug P15,000 nga kantidad sa livelihood assistance.
Sa unang adlaw unang nahatagan ang mukabat sa 413 ka benipisyaryo nga gikan sa 9 ka mga barangay sa Gensan ug karong adlawa, Setyembre 6, mukabat sa 454 ang makadawat ug ayuda gikan sa 11 ka barangay.
Kaabag sa DSWD XII sa cash distribution ang GenSan City Social Welfare and Development Office sa pagpanguna ni Ms. Genelene Vidanes ug LGU GenSan sa pagpanguna ni Gensan City Mayor Lorelie Pacquiao.
Ang Livelihood Assistance Grant usa ka tabang-panginabuhian sa mga negosyanteng na-apektuhan sa pandemya ang ilang panginabuhian.(Alfredo Madas Jr. )