DAVAO DEL SUR – Patay ang duha ka mga giingong kaalyado sa Islamic State of Iraq and Syria kun ISIS human gipahigayon ang hiniusang ronda sa Kapolisan ug Militar sa usa ka komunidad sa may Barangay Aplaya, Hagonoy Davao del Sur. Ang mga napatay giilang miembro sa Dawlah Islamiyah nga giingong grupo nga kaalyado sa ISIS.
Sumala pa ni Senior Supt. Ferlu Silvio, police provincial director nga gisilbi sa kapulisan ang search warrant sa gipuy-an sa mga suspek nga sila si Norhan ug Norton Delangalen didto sa Barangay Aplaya, Hagonoy sa probinsiya human namonitor ang ilegal nga pagpayuhot niini sa tag-as nga kalibre sa armas.
Napata yang managsuon human sila misukol sa kapulisan ug militar hinungdan nga napusilan ug diha-diha namatay si Norhan samtan si Norton nakabsan sa kinabuhi samtang padulong sa balay tambalanan. Nasayran nga naghiusa ang puwersa sa Davao del Sur Police Provincial Office, Criminal Investigation and Detection Group (CIDG) ug ubang ahensiya sa kapolisan, lakip na ang militar.
Narekober sa kapolisan ug kasundaluhan ang usa ka kalibre .45 pistola, magazine nga adunay unod ang unom ka buhing bala, duha ka granada, mga himan sa improvised explosive device (IED) ug duha ka bandera sa ISIS. Samtang, gibutyag ni Chief Insp. Francis Sonza nga ang Dawlah Islamiyah, dili direktang kaalyado sa grupong ISIS apan suportado niini ang teroristang grupo. Nagplano matud pa ang Dawlah nga mohimo og teroristang kalihukan sa Southern Mindanao.Hinuon, hugtanong gilimod sa pamilya sa mga napatay ang pasangil sa mga awtoridad.