CAGAYAN DE ORO CITY- Sa tinguha nga mabuhi pagbalik ang nasyonalismo ug ang Filipino Spirit sa katawhan sa Northern Mindanao, ang Ayala Foundation miapod-apod sa moabot 555 ka mga Philippine flags ngadto sa mga pampublikong eskwelahan sa probinsya sa Misamis Oriental niadtong biyernes, Agosto 9. Ang pagpangdistribute sa bandila gipahigayon sa Opol National Technical School sa lungsod sa Opol ning lalawigan nga nakaangkla sa Maging Magiting Campaign sa Ayala Foundation.
Matud pa ni Education Undersecretary Tonisito Umali nga nakatambong sa maong higayon nga mahinungdanon ang nahisgutang programa kay kini motabang sa katawhan ilabi na sa mga estudyante ug magtutudlo sa pagsabot nga ang edukasyon dili lang kutob sa pagsabot sa mga subjects sa Math o Science kon dili ang pag-ila sa atong pagkaPilipino ug paghigugma sa nasud-Pilipinhon.
Atol sa maog higayon, moabot 300 ka mga tawo ang nanambong nga gilangkoban sa mga studyante, magtutudlo, representante sa gobierno, sa National Historical Commission on the Philippines ug daghanan pang uban.
Ang Maging Magiting Campaign mao ang pagtubag sa National Historical Commission of the Philippines claim nga adunay gintang ang usa ka gatos ka libo nga mga flags sa tibuok nasud.