Nasikop sa kapolisan ang usa ka batan-ong lalaki kinsa nabani-og na sa pagpamaligya og illegal drugs ginamit ang social media. Gisignit sa mga sakop sa Abellana Police Station sa Cebu City Police Office (CCPO) ang 21 anyos nga drug suspect nga si John Angel Bontilo atol sa drug bust operation sa Visitacion Street, Barangay Sambag II, Cebu City, mga 5:30 sa buntag kagahapon, Nobyembre 27, 2018. Nasakmit sa kapolisan gikan kang Bontilo ang gituhoang shabu nga balor baleg 35 mil pesos kapin.
Matud ni Chief Inspector Eduardo Sanchez, Abellana Police Station Commander nga nakadawat sila og report bahin sa illegal activity ni Bontilo pinaagi sa anti-criminality hotline ni Cebu City Police Director Royina Garma, “Itug-an ni CD”. Tulo ka semana nga surveillance ang gilusad sa kapolisan batok kang Bontilo nga miresulta sa pagkasikop sa nahisgutang drug suspect, sumala pa ni Sanchez.
Pinaagi sa iyang Facebook post, gipadayag ni Bontilo nga mahimong mapalit ang shabu buy-one take-one sa kantidad nga 250 pesos kay menos ang palit.
Apan gipanghimakak ni Bontilo nga siya maoy resposable sa pag-post ginamit ang Facebook sa negosyo sa illegal drugs kay matud pa niya gi-hack sa iyang uyab ang iyang Facebook account.
Dugang pakisusi sa kapolisan nagbutyag nga ang contact ni Bontilo nagagikan sa Cebu City jail diin natanggong usab igsuon niini gumikan sa mga kaso sa illegal drugs.