Gisugdan karon sa Department of Energy (DOE) ang pakisusi labot sa giingong OIL SMUGGLING sa Sugbo ug Bohol pinaagi sa mga sakyanan sa kadagatan. Gi-angkon sa DOE nga nakadawat na kini’g mga reports bahin sa “illegal delivery” sa mga produkto sa petrolyo ngadto sa nagkalain-laing rehiyon.
Ang labing uwahi nga giingong ” Illegal delivery ” sa mga produkto sa petrolyo nahitabo sa lungsod sa Loon, Bohol niadtong nakalabay”ng Dominggo,Enero 6, ug nakuhaan kini’g ” video”.Base sa maong video, usa ka barko ang nagdiskarga og lana ngadto sa mga “oil tankers” didto sa Loon, Bohol. Gipunting sa imbestigasyon sa DOE ang posibilidad nga gikan ra usab sa Sugbo o kaha gikan ba sa gawas sa nasud ang gipang-diskarga nga lana.
Gibutyag ni DOE Legal Officer Mark Gamallo nga nakigtambayayong karon ang ilang buhatan sa Philippine National Police Maritime Group aron masikop ang mga responsable sa maong illegal nga kalihukan.
Gitumbok sa reports nga mga na-ilang negosyante maoy responsable sa Oil smuggling”. Malagmit nga nakahuna-huna’g “legal shortcuts” ang hingtungdang mga negosyante aron maka-angkon kini’g dagkong ganansya kay dili na man kini makabayad og” excise tax” ngadto sa gobierno, sumala pa ni Gamallo.