Gipahigayon kaganihang buntag, Agosto 30, 2022 ang inisyal nga panagtigum kalabot na sa pagpahigayon sa “ALAY LAKAD 2022” (annual walk activity and raffle draw) karong umaabot Oktubre 2, 2022, adlaw’ng Domingo didto sa Dipolog City Sports Complex, sa Barangay Olingan, ning siyudad.
Ang maong tigum ang gidumala ni City Mayor Darel Dexter T. Uy duyog sa presensiya sa mga buhatan nga adunay kalambigitan sa maong kalihokan.
Nagkalain-laing concerns ang gituki alang sa kalamposan sa maong kalihokan. Sigun sa nasayran nga ang maong kalihokan ang magsugod sa alas 4:00 sa sayong buntag sa nasangpit nga petsa sa unahan didto sa Dipolog Boulevard diin kini manukad, ug gikatakdang pagasugdan ang lakaw sa alas 5:00 ang takna sa susamang buntag.
Sama sa gihapon, kining maong tinuig nga kalihokan ang pagasalmotan sa mga lokal ug nasudnong pampublikong mga buhatan ug ahensiya, pribado ug pampublikong mga tulunghaan, mga kahugpungan, men in uniform, establismento, mga Barangay Councils ug mga indibidwal usab nga buot mosalmot.
Lakip sa mahimong mobolok sa Alay Lakad 2022 mao ang pagpahigayon sa “Search for Mr. and Miss Alay Lakad 2022”, nga pagasundan sa usa ka raffle draw, diin ang swerteng mananaug ang makadaug og mga premyo.
Gumikan sa katuyu-an niini nga maka-kalap og pondo alang sa paggasto sa mga “Alay Lakad Scholars” nga padayong nagtungha hangtud ning kasamtangan, ang mga raffle tickets ang mahimong mapalit sa kantidad nga tag 10 pesos lamang.
Gituki usab ang nagkalain-laing kaakohan sa mga buhatan nga adunay kalambigitan niini aron sa pagsiguro gayud sa kalamposan niini. Adunay premyo ang nag-paabot alang sa mga mopalit og mga raffle tickets.
(Source: Dipolog City Government Facebook page)