Napahimuslan na karon ang paspas ug hamugaway nga transaksyon sa LTO-Dapitan City Extension sa buhatan niini sulod sa Gloria de Dapitan.
Dinhi mamahimo na ang paglukat sa student’s permit, paglukat ug pagrenew sa driver’s license ingon man pagpapuli sa license classification.
Matud ni Elma Riza P. Maghinay kinsa nagrenew sa iyang lisensya, paspas nga nahuman ang iyang transaksyon ug nagpasalamat siya ngadto kay Mayor ug karon Governor-elect Rosalina “Nene” Jalosjos, 1st District Congressman Romeo Jalosjos Jr. ug kanhi Congressman ug karon Dapitan City Mayor Seth Frederick “Bullet” Jalosjos sa ilang gihimong pagpaningkamot nga mabutangan og extension nga buhatan sa LTO sa Dapitan.
Sa pagbisita ni Regional Director Mohammad Yusoph A. Lamping ug Assistant Regional Director Johan S. Macaumbos gibutyag niini nga nagpadala na sila og request letter ngadto na sa opisina sa Assistant Secretary aron mamahimo ng makaproseso sa pagrehistro sa mga motor ug sakyanan ang extension nga buhatan.
Sumala ni Jose Maria Gonzales, chief sa LTO Dapitan nga bukas ang ilang buhatan gikan Lunes paingon Biyernes sa may alas 8:00 sa buntag hangtod alas 5:00 sa hapon.
Dugang ni Gonzales nga di na kinahanglang moadto pa sa laing lugar aron sa paglukat og student permit ug lisensya kay anaa sab sa buhatan ang LTO Accredited Driving School ug LTO Accredited Medical Clinic.
Ang LTO-extension office sa Dapitan modawat sa mga transaksyon dili lang gikan sa unang distrito kun dili lakip na sa mga kliyente gikan Dipolog City, ubang mga lugar nga sakop sa ika-duha ug ika-tulong distrito.
(Source: City Information Division Dapitan Facebook Page)