Nadakpan ang duha ka lalaki ug tulo ka babae atol sa gipahigayon nga buybust operation sa mga personahe sa Villanueva Municipal Police Station sa pagpangulo ni PMAJ Renz Marion Danao Serrano sa may Purok 4, Barangay Looc, Villanueva, Misamis Oriental, kaadlawon sa Agosto 31, 2022, Miyerkules.
Naila ang mga dinakpan nga sila ni Elmer Factura , 49 years old, minyo, driver sa starex van nga taga Purok 2, San Martin, Villanueva Misamis Oriental, Roque Joaquin  59 years old, minyo ug taga Zone 3, Poblacion, Tagoloan Misamis Oriental og naaktuhan nga gagamit sulod sa sakyanan si Anna Mae Nabong, 24 years old, single mother ug taga Zone 5, Baluarte, Tagoloan Mis Or, ug matud pa iyang gihanggat nga mga kauban nga sila ni Antonet Mercader 18 years old, single, nagpuyo sa Purok 7  Balacanas, Villanueva, Mis Or ug si Rachel Malapay 31 years old, single, ug taga Zone 5, Baluarte Tagoloan, Misamis Oriental.
Napalitan sa poseur buyer ug balor one thousand pesos nga gituohang shabu ang mga suspetsado sulod sa ilang gisakyan nga starex van ug wala nila masayri nga usa diay kini ka pulis ang ilang naka transact.
Ug sa dihang gipahigayon na ang pag body search sa mga suspects, nakuha sa posisyon sa duha ka mga lalaki ang ubay-ubay nga pakete sa gituohang mga shabu, buybust money nga isa ka libo, drug paraphernalias ug usa ka digital weighing scale nga maoy gamiton sa pagtimbang sa ilegal nga droga. Samtang walay nakuha nga mga butang sa mga babaeng dinakpan apan aminado ang isa ka babae nga gagamit siya ug shabu.
Ipailalom ang tanang mga nadakpan sa drug test ug kung mag positibo pagasakaan sila dayon  ug kasong ilegal nga pagamit ug pagbaligya sa ilegal nga droga o RA 9165, ug anaa silang lima karon nabalhog na sa presuhan sa Villanueva Police Station para sa dugang imbestigasyon. (Cheleste Simene)