Patay ang usa ka lalake human kini gipusil sa duha ka wala mailhing mamumuno mga kapin kun kulang alas 2:41 sa kadlawon, Agusto 21, dapit sa may simbahan sa Barangay Galas, Dipolog City.
Ang biktima nailhang si Aldrin Reyes Abitona, legal age ug residente sa Barangay Olingan, ning syudad.
Sa inisyal nga imbestigasyon sa ningresponding personnel sa Dipolog City Police Station pinangulohan ni PLtCol Edwin D. Verzon, Acting Chief of Police nasayran nga nianang kadlawon sa Agusto 21, 2022 ang biktima matud pa gipusil sa duha ka wala mailhing mamumuno tumong gayud sa iyang ulo gamit ang caliber .45 pistola. Kini maoy nahimong hinungdan sa hinanali niyang kamatayon.
Human sa gihimong pag pusil ang duha ka mi pusil daling mipahilayo padulong sa Barangay Gulayon, samtang ang biktima gibiyaang nagbuy-od nga wala nay kinabuhi.
Sa pagkakaron ang mga PNP personnel sa Dipolog nagpahigayon ug hot porsuit operation alang sa posibling pag-ila ug pagsikop sa duha ka suspetsado, samtang ang patay’ng lawas sa biktima atua na sa hingtungdan nga pamilya. (Rosevelt Mondinido)