Dipolog: Kaso sa dengue sa Dapitan misaka sa 614%

0
0

“Misaka ngadto sa 614% ang kaso sa dengue sa Dapitan,” sigun ni Dr. Rolito V. Cataluña base sa mga datos sa City Health Office (CHO) gikan sa bulan sa Enero hangtod Hulyo niining tuiga kompara kaniadtong bulan sa Enero hangtod Hulyo sa tuig 2021.

Niadtong Agosto 5, tulo ka dengue cases nahitala sa CHO: duha (2) ka kaso sa Brgy. Sta. Cruz samtang usa (1) sa Brgy. Sinonoc.

Si Mayor Seth Frederick “Bullet” Jalosjos mi mugna sa Dapitan City Anti-Dengue Task Force pinaagi sa usa ka Executive Order kaniadtong Hulyo 27.

Gipangulohan sa mayor ang task force nga gitahasan sa igong pagsabwag sa impormasyon ug pagtuki sa mga saktong aksyon mahitungod sa pagpakgang sa sakit nga dengue.

Wala pa gipa ilawom sa state of calamity ang Dapitan, apan matud ni Dr. Cataluña, aduna nay epidemic sa dengue ang dakbayan. Nagsugod ang pagtaas sa kaso niini kaniadtong Pebrero ning tuiga.

Nasayran gikan sa World Health Organization (WHO), ang dengue usa ka viral infection nga napasa sa mga tawo pinaagi sa pinaakan sa lamok nga natakdan sa dengue virus (DENV).

Giawhagan sa CHO ang tanang molupyo sa dakbayan nga buhaton ang matag adlaw nga “4:00 o’clock habit” sa pagpanglimpyo sa mga panimalay, tulonghaan, buhatan, ug uban pang establisyemento sa mga barangay.

Pahimangno usab niya nga likayan ang pagpondo og tubig sa mga banyera nga mahimong ma-itlogan sa lamok nga nagdala sa dengue virus.

Source: DAPITAN CITY INFORMATION DIVISION Facebook page

LEAVE A REPLY

Please enter your comment!
Please enter your name here