Malamposong gipahigayon ang usa (1) ka adlaw nga “Job Fair” sa kagamhanang lokal ning siyudad pinaagi sa buhatan sa PESO duyog na sa koordinasyon gikan sa nagkalain-laing lokal employers dinhi sa atong dakbayan.
Ang maong kalihokan ang gipahigayon didto sa City Mall sa Barangay Sta. Felomina nga nagsugod sa may alas 9:00, Agosto 10, 2022.
Sigun sa nakuhang inpormasyon, nga kining maong kalihokan ang gisalmotan sa mokabat 20 ka mga lokal employers ug 4 ka mga Overseas Recruitment Agencies nga nakabase dinhi sa atong siyudad nga gisalmotan usab sa daghanang mga katawhan kinsa nangindahay nga makakita og trabaho.
Matud pa nga ang maong kalihokan ang nagtanyag sa kapin sa 1,207 ka mga job opportunities alang sa lokal ug overseas employment.
Sa pagbukas sa maong kalihokan, usa ka hamubong programa ang gihimo diin mipabati sa iyang hamubo ug bulawanong mensahe si City Mayor Darel Dexter T. Uy.
Samtang atol sa maong kalihokan, makita usab ang presensiya nila ni DOLE OIC-Provincial Director, Aileen Mondijar, Engr. Alan Bacatan sa TESDA, SSS Branch Manager, Mr. Vincent Trani uban sa pipila ka mga personahe gikan sa buhatan sa PAG-IBIG, Dipolog City Police Station ug City Mall Supervisor, Ms. Maria Zabeth T. Tan.
Gilaoman nga human niini, adunay daghanan sa atong mga katawhan ang mahatagan sa trabaho, basi sa ilang kwalipikasyon, ug sa susamang bahin, usa sa mga pamaagi nga makatabang sa pagkunhod sa suliran sa unemployment dinhi sa atong dakbayan ug sa nasud sa kinatibuk-an.
(Source: Dipolog City Government Facebook page)