Nakatakdang isalang sa question hour sa Kamara de Representates si Budget Secretary Benjamin Diokno, alas-3:00 ng hapon bukas, Disyembre 11.
Ito ay upang pagpaliwanagin si Diokno hinggil sa umano’y 52 billion pesos na isingit sa panukalang budget sa 2019.
Bukod dito, inaasahang matatalakay din sa question hour ang iba pang usapin tulad ng epekto ng TRAIN Law at sinasabing pork barrel sa 2019 national budget.
Magugunitang, pinagtibay ng Kamara bilang Resolution Number HR 00158 ang inihaing resolusyon ni Minority Leader Danilo Suarez na humihiling sa pagdalo ni Diokno sa question hour hinggil sa panukalang budget.
Kasunod nito, pinadalhan ng Kamara si Diokno ng pormal na imbitasyon kung saan kanilang iginiit ang kahalagahan ng presensiya ng kalihim sa plenary session.
(Ulat ni Jill Resontoc)