Gipangandaman na sa Cagayan de Oro Water District (COWD) sa posibleng epekto sa kainit nga panahon ngadto na sa pagsupply sa tubig bisan pa nga naningkamot kini sa pagpugong sa risgo sa water shortage sa syudad.
Hinuon ang maong water provider sa Cagayan de Oro nanglantaw nga dili mahinabo ang pag rasyon sa tubig ngadto sa siyete sientos mil ka mga users niini.
Ang COWD mipasalig nga tanang pamaagi ilang giplastar aron magpabilin nga stable ang supply sa tubig.
Sa statement nga gipagula sa COWD kini nag-ingon nga naghimo sila sa ilang kaugalingong lakang aron sa pagsiguro gayod nga magapadayon ang supply sa tubig bisan pa niining mga bulan sa summer.
Ang pag-ayo sa leakage sa mga pipelines gihingusgan usab nila aron malikayan ang pagkausik sa tubig samtang ilang hugtanong giawhag ug gipahinumdum ang concessionaires sa insaktong paggamit sa tubig pinaagi sa pagconserve, pagrecycle ug pagreuse niini, hagit sa COWD.