Bigong ipatupad ni dating PhilHealth President Ricardo Morales ang board resolution noong nakalipas na taon na nag-aatas sa 26 na opisyal ng ahensya na magbitiw sa puwesto.
Ito ang nilinaw ng bagong PhilHealth President Dante Gierran kasunod ng inilabas niyang memorandum para sa paghahain ng courtesy resignation ng mga opisyal ng ahensya.
Giit ni Gierran, alinsunod ang kaniyang naging pasya sa direktiba ni Pangulong Rodrigo Duterte na linisin ang PhilHealth mula sa mga tiwali upang matiyak na tanging ang mga tapat at malilinis lamang ang matitira sa kanilang hanay.
Una rito, inireklamo na sa Ombudsman ng National Bureau of Investigation (NBI) sina Morales at iba pang mga opisyal ng PhilHealth kaugnay ng maanomalyang pagpapatupad ng interim reimbursement mechanism (IRM).